Aprilin 27-sindä, büük saygı duyarak gagauz aydınnadıcısına Mihail Çakirä, angısı ilk çevirdi gagauz dilinä Bibliyayı, biz kutlȇȇrız Gagauz dilinin hem yazısının gününü – Ana Dilimiz.

2022-nci yılda “Ana dilimiz” yortusunu ayırı duygularlan karşılȇȇrız. Bu yıl tamannanȇr 65 yıl, nicä kuruldu ilk alfavitimiz hem 100 yıl alfavitimizin proektini hazırlayan bilimcinin – Dionis Tanasoglunun duumasından.

Gagauzlara, nicä dä başka halklara, ana dili – o milletin var olmasının önemni bir payı, angısını lääzım korumaa. Bu gün getirer aklımıza ana dilimizä büük dikkatlık göstermenin lääzımnıını, uyandırȇr hem ilerleder merak istoriyamıza hem kultura adetlerimizä.

İnanȇrım, ani bu yortu büünkü gündä dä, gelecektä dä birleştirecek bizim çokmilletli regionumuzun halklarını, verecek kolaylık ilerletmää hem korumaa tradiţional paalılıklarını.

Kutlȇȇrım hepsini bu gözäl yortuylan! Dileerim saalık, uygunnuk, usluluk hem annaşmak.

 

Saygıylan,
Gagauziya Halk Topluşun Başı
Dmitriy Konstantinov